على الوش

هو يجرى ايه ان الناس ترجع تانى بسيطه وطبيعيه
زهقت من انت تحاول تكون مش انت
زهقت من تلوى بوزك من ولا حاجه
زهقت من كلمه حبيبتى وهى مش بجد

زهقت من اللى بيضحك فى وشك وهو اصلا مش طايقك
زهقت من اللى عامل صاحبك وانت مش فاهم هو عاوز ايه!
زهقت من غدر وخيانه الناس اللى بجد وثقت فيهم
زهقت من قله الأصل وهما من للأسف من اصل

زهقت من اللى بيقول عاوز ايه وهى علشان يقول عملت
زهقت من الأسئلة اللى مالهاش لزمه وفى نظري فضول
زهقت من كلمه حاشوف اچندتى وهى اصلا فاضيه
زهقت من اللى بيعرفك مش لذاتك وشخصك

زهقت من اللى مابيقدرش الجميل ويتجاهل وجودك
زهقت من قله الضحكة من القلب بجد من غير ماتكون عليك
زهقت من خبث النفوس المستفحل واطار التعامل بطبيعية
زهقت من الوعود المزيفة وهو هوا سخن وبس كلام

زهقت من الاستعباط في الشغل والمفروض تعمل واجبك
بضمير
زهقت من انك تبنى نفسك على حساب غيرك
زهقت من التهاون في الالتزام وده بقه العادى في الحياه
لا في وقت ولا ولاء ولا احترام ولا في وعد ولا كلمه!
زهقت من الزباله في الشارع

زهقت من الميه المقطوعه ويقولوا مدن جديده
زهقت من كهربا جهدها مايقومش موتور مايه وشركه ترمى على شركه من الباطن
زهقت من الشحاتين في كل ناصيه وشارع وان كانت دى علامه انظار واضحه من اللى جى وبيحصل
زهقت من الناس من حتى ضحكه بشوشه كلها بؤس وهموم

زهقت من وباء بيجرف أرواح ناس اعرفهم واعز ناس
زهقت من كل واحد عمال بيكركب حياته ويملاها ضغوط علشان يواكب اللى حواليه علما لو عاش عيشته حايرتاح وكله يرتاح ..
هي تعبت اكتر من زهقت وصدمات طول الوقت بتعجب وعلامات استفهام!
كل واحد عنده نفس المشكله بطريقته, كل واحد بيحاول يعيش ويتعايش بطريقته وعلى اد امكانياته وبمواجهته للمواقف في حياته بأشكالها..

لو كل واحد عاش وكفى نفسه بحياته من غير مقارنه لحياة غيره حايرتاح وحاجات كتير حاتتغير سواء من النفوس ومن الضغوط !!
كلمه اشمعنى دى كلمه مدمره تدمر اى نفس واى علاقه واى بيت وحياه!!
الحياه عموما فيها الحلو والمر والكويس والشرير والطيب والخبيث وصفات كتيره موجوده ونعرفها لكن بتتحور للأسف زى الكورونا وتتشكل باشكال لو مش تتعود عليها وتتفهما حاتتعب

الانسان بطبيعته بيدور على راحته وبيرجع لنفسه جوه الأربع حيطان بيته,
الناس فقدت الامل ان ممكن زمن البساطه والطبيعيه يرجع تانى .. ليه لأ لو كل واحد ابتدى بنفسه حيلاقى مع الوقت اللى حواليه بقوا كده ويكسروا الحيطان دى..

قله الاصل والعيشه للمصلحه وانك تعيش اليوم بيومه من غير ماتفكر ولا تحس ولا ترتبط بحد يعنى من على الوش هى دى سمه الزمن ده
الاحتياج واليأس والوحده والالم النفسي والضغوط الماديه
لها دور في حياه الانسان وتعاملاته

كل الحاجات دى سلبيات في الحياه بنواجها ونحاول نتخطاها , ونحاول نتمسك بايجابيتنا في نظرتنا للحياتنا لنتعايش فيها برضى وسكينه..
الالتزام بمبادئنا وكلمتنا واصول التعامل بالثقه والاحترام والصدق والحب والبسمه ممكن يكون بدايه..
بس مش من على الوش!!