سكينه مفقوده

ايه هو الامان والسكينة …معناها ايه بتحسها وترجمها وتتطور معاك ازاى!
الامان حاجة كبيرة اوى, ان البنى ادم يبقى دايما حاسس بالامان فى حياته بتديله رسوخ فى حياته بتديله قوة بتديله هدوء, هى بتخلى السكينة سكينة نفسه, هدوء مع حياته, هدوء مع نفسه, هدوء فى تعاملاته, هدوء فى تفكيره,هدوء فى اسلوبه..
هل احنا عايشين فى هدوء وسكينة! هل احنا شايفين ان تصرفات البشر مع بعض بيدى امان وسكينة! مفيش حاجة توحى بامان وسكينة الأيام دى, معظم البشر عنده انانية, حب ذات, بيعبد نفسه, بيعظم نفسه, بيشوف نفسه من غير مراية للاسف, ولو شاف نفسه فى مراية بينكر صورته..
اوحش حاجة ان البنى ادم اللى راضى بحياته وراضى باللى حواليه وراضى بالتعاملات وراضى بظروفه الموجوده أصلا أحيانا بيقبل الواقع السلبى ويتعايش بيه..
غير الظروف اللى البنى ادم بيتعامل بيها ويعيش بيها, دايما ساعات بتحطه فى مواقف بيدى احساس ماعندوش حيله وانه ضعيف, لكن ضعفه ده بيكون قوة للتامل للدراسة للفهم للتكيف للتعامل, حتى يكون حكيم في حكمه لدخوله في حياه بفكر مختلف!!
ونوعيه تانيه ممكن سطحى او ملتوى بخبايا لها عواقب نفسيه وفى نفس الوقت مردود كل ده بيكون فيه اهانة وجرح وحزن لعدم المقدرة للمواكبة للدفاع واحساس بخيبه امل من تبلد شعور المحيطه من غطرسه النفس والانانيه المعميه ومع الاحداث اللى ممكن تكون غير دنيته او ضد طبيعة البنى ادم عموما..
طبيعى ان البنى ادم دايما مفروض عليه احداث فى حياته, قليل لما يقدر يحدها ويحجمها, واحيانا يحط نفسه فى اوضاع كويسه ماتكونش فيها اذى, او ان فيها حاجة بتضايقه, لان هيه كلها أوضاع وحسب ظروف وابواب كتيرة اوى من الحياة بيدخل جواها, لكن دايما يبقى عنده حاجة معينة بيدور وراها السكينة والامان هى دى المظلة او الملجا بتاعه هى دى الدرع اللى بيتقوى تحته او بيحتمى بيه عشان يقدر يحمى نفسه من ما يجرى في حياته.
الامان والسكينة دول دايما يبتدوا منك من جواك وبعدين بيتطوروا وينموا من تعاملات من حولك, يعنى من مردود من حولك اذا كانوا صادقين وفيه ثقة, مفيش خيانة, التعامل يكون صريح واضح, مايكونش فيه احساس بالشك, بمعنى تكون كتاب مفتوح من غدر او فعل من وراك تحت مسميات واعذار كتيره..
فيه مواقف واحداث وعناصر كتيرة جدا من الصفات بتبين البنى ادم اللى قدامك, لكن فى نفس الوقت ماتقدرش انك تقفل ابواب كتيرة فى حياتك لان النوعيه دى موجودة وبتضطر تتعايش معاها ولكن بتعمل نوع من الضغط المعنوى فى حياتك فبالتالى السكينة بتاعتك بتتاثر والاحساس بالامان مع البنى ادم او البنى ادمين بيبقى مهزوز
العلاقات ما بين الناس مهم جدا تكون فيها صدق اللى تقدر تعمله قدامى تقدر تعمله من ورايا لكن اللى حتعمله من ورايا معناه انه غلط, نسبة الغلط بتختلف.. غلط عشان بيبقى فيه اختلاف وجهات نظر, او مش لازم اتعامل مع اى ان سواء كان موقف او ناس, او ابقى مش عايز اخسر حد او بسرق او أكون اضمر سوء من جوه واظهر الحب وغيره من اى حاجة ممكن تكون, لكن فى الاخر هو غلط لان فيها نوع من انواع الكذب, ومش بس كذب لان ده نوع من انواع الخيانة, خيانة عهد, خيانه كلمة, خيانة موقف, خيانة تعامل, من الاخر هو غلط تحت اى مسمى او ظرف..
اوحش حاجة فى الدنيا قلقلة السكينة, سكينة النفس كنز وهبة, ولما بتكون موجودة دى بتبقى عطية من الله انها موجودة..
فهل ياترى لما تتسحب سكينة النفس تبقى العيشة عيشه!!
العيشه من غير الامان والسكينة يفصلك عن روحانياتك, تنزلك على واقع مش صحى أليم, تدخل فى عالم بتشوف فيه قبح ماتحبش تتعامل معاه
وهيه نفوس البشر لانها مش سوية!!
اهم حاجة انفصل عن الواقع بدرجه اعلى بنظره فيها تفهم لما يدورحولك, لكن احمى دايما امانك وسكينتك, غطيهم بدرع جامد ماحدش يقدر يهزوا او ياخده منك, عشان ماتدخلش لعالم عدم الأمان المرفوض.