ما كنتش واعي شنو كاندير و “المعجون” هو سبابي فالتحرش

من بعد ما شاف الجميع الفيديو لي تنشر على مواقع التواصل الاجتماعي نهار الإثنين، ديال الشاب لي تحرش بواحد البنت بالشارع العام بمدينة طنجة من بعد ما قام يتحرش جسدي موثق بفيديو من صديق ديالو لإثارة الإعجاب، وهي تهمة كايعاقب عليها القانون في الفصل 503-1-1 والتي تتراوح العقوبة ديالها ما بين سنتين إلى 5 سنوات وغرامة مالية، هاد التصرفات خلات الآراء كاتضارب بين المواطنين، كل واحد أش كايقول، هو الخاطئ وكاين لي كايقول هي ماكانش خصها تلبس هكاك.

المهم تنشر الفيديو على نطاق واسع ما بين المواطنين و الجرائد الالكترونية، و صدرت ولاية أمن طنجة بحث في هاد القضية وأمرت بالقبض عليه، ولقا راسو هاد الشاب المتهور هو ولي صور الفيديو في مأزق و ورطو واليديهم معاهم، هنا هايخرج واحد من هاد الشابين يوم الثلاثاء وهايبرر الفعلة ديالو بالفعل الخارج عن الإرادة ديالو من بعد ما قال أنه تم التخدير ديالو من طرف الأصدقاء،و بلي دارو ليه شي حاجة فواحد المنتوج غذائي، السبب لي خلاه يدير هاد التصرفات الغير مسؤولة، وهذا يبقى سبب غير مقنع لهاد الجريمة لي كايعتبرها المجتمع مشينة فحق النساء والشابات والأطفال مغاربة كانو ولا أجانب، والشباب خصهم يتحكم فالغريزة ديالهم وماينساقوش لهاد التصرفات لي تقدر تقلب حياتهم رأسا على عقب.

المهم الفيديو الثاني لي كايشرح فيه الشاب علاش دار هاد التصرفات تا هو وصل لمستوى عالي من المشاهدة، في انتظار شنو الإجراءات لي هادي تاخدو فحقو المحكمة بطنجة.