متي نعود الي الحقيقة يا انسان إنك مجرد عبد ليس أكثر ولا أقل
اليوم خطر على بالي موضوع غريب جدا هل فكرت في يوم ما وانت داخل دورة المياه أن يتم قبض روحك تخيل سيادتك معايا كده نهاية غير طبيعية والاسوأ في الأمر أن الناس اللي هتيجي ترفع الجثة هتكون مشمئزة من القذارة اللي الجثة فيها هل تصورت الموضوع أو تخليته مجرد التفكير في الأمر مؤذي نفسيا!
طيب ما تيجي نفكر بجد كام مرة شكرت رب العالمين على دخولك وخروجك سليم؟
مش كده وبس كام مرة شكرت الخالق على تسهيل عملية الإخراج عندك مع العلم أن فيه غيرك في المستشفيات عندهم معاناة من احتباس في البول واضطروا لتركيب قسطرة أو إجراء عمليات جراحية ونفس الوضع للقولون والام القولون
دي حاجة بسيطة سيادتك بتمر بيها كل يوم ومع ذلك لسه ما بتروحش تصلي في المسجد أو حتى ف البيت
ولسه عمال تسرق زي ما أنت وتاخد حاجة غيرك
وليه عمال بتسب وتلعن وفي الناس بسبب أو دون سبب
ولسه عمال تغتاب ونم وتجيب في سيرة الناس
ولسه عمال تأكل حقوق غيرك بالباطل دون وجه حق
ولسه عليك ديون وفلوس سيادتك مش ناوي تسددها وفاكر نفسك ناصح
ولسه عمال تتكبر ع الخلق وفاكر نفسك وزير أو رئيس أو مدير أو ضابط مع إنك في النهاية عبد لا اكتر ولا أٌ قل لا تملك في نفسك أي شيء تقوم بكبريائك وغرورك فاكر إنك بتحكم في الخلائق مع إنك تابع المشكلة والمعضلة إنك عبيـــط
ولسه يا مسكين عمال تجري في الدنيا وتلاحق عليها يمين وشمال وهي ما تساوي دخولك وخروجك من دورة المياه
شفت أنت بتفكر ازاي ولسه تفكيرك شغال ازاي حتى بعد ما قرأت الكلام اللي فات حتة فيروس صغير(كورونا كوفيد 19) دمر عالم ومازال مستمر وانا بكلمك على حاجة أقل م الفيروس
عاوزك تراجع كلامي تاني وتالت وشوف أنت وانا وغيرنا مقصرين قد ايه في حق ملك الملوك الذي أسبغ علينا الكثير من النعم لكن الشهوات والملذات لاهية العقول والقلوب
في النهاية اذا كلامي ضايق سيادتك يبقي الرسالة وصلت
اللهم يا مثبت القلوب ثبت قلبنا على ديناك
اللهم يا مصرف القلوب صرف قلوبنا على الطاعة والعبادة
اللهم ردنا اليك ردا جميلا وانت راض عنا ولا تخزنا يوم العرض عليك
