من خواطرى.. مسافات ذكريات السنين

الزمن والمسافة هما امبارح هما  النهارده هما بكرة هما الماضى هما الذكريات, هما كل يوم بتعيشه وكل يوم بترجع له وكل يوم بتفكر فيه, كل يوم بيخليك تفتكر فى اللى جاى و اللى راح او فى اللى انت عايش فيه!

الزمن هو السنين, السنين اللى عدت, السنين اللى راحت, والسنين اللى انت فيها, السنين اللى جايه.

المسافة هى مابين كل سنة وسنة, مابين كل  يوم ويوم مابين كل دقيقة ودقيقة  مابين وقت من الزمن وزمن!  كل فترة بتعدى فيها ده  زمن ووقت ومسافة..

حسابات الهندسه فى الزمن والمسافة مشابهه لحسابات البنى أدام لكن

المسافة فى الفيزيا او الهندسة هى طول الخط المستقيم بين نقطتين عل ىسطح الارض او المقدار  اللى يتحركه جسم معين من نقطة الى نقطة تانية وتقاس بالمتر ومشتقاته,  اما الزمن فهو الوقت الذى يستغرقه الجسم اثناء تحركه من نقطة الى النقط الثانية وتقاس بالدقيقه او الثانية او مشتقاتها,

فى الاخر الناتج هو السرعة وهى حاصل قسمة المسافة على الزمن  او معدل قطع المسافة على الزمن..

المسافات مابين الازمان دى الهدنة اللى انت بتكون جواها  اللى هى بتدخل جوه فيها مع نفسك  بتراجع نفسك يا بتكون تعبان من الحقبة اللى كنت فيها فبتحتاج ترتاح عشان تلم طاقة تلم نفسك لحقبة جاية.. وهو  وقت المستقطع فى حياتك بيعدى وانت مش دارى بيه..

البنى ادم بيعدى كل يوم بمجموعة من التجارب سواء هو بيتعامل ويتفاعل بيها او بتبقى جوه دماغه شريط بيتسرد بيعيش معاه بياخد منه اللى يقدر يتعامل بيه من خبرته فى اللى هو عايش بيه او بيغطس فيه ويعيش مع ذكرياته وكتير ينفصل معاه وهو ده من الأوقات المستقطعه..

الجميل فى الزمن انه بيبقى احداث ورا بعض, مجموعة من السنين المتتالية احداثها ووقائعها  واحيانا ناسها,  بيكون فيها حكايات كتير بيكون فيها احداث كتير, بيكون فيها تجارب كتير, ولكن بتاخد دورتها  وتدخل حقبة تانية من الزمن .

الخبرات اللى انت بتكتسبها المفروض تكون هى الطريق بتاعك,  انك تكون اتعلمت وشفت حاجات فى حياتك,  ومواقف بتسترجعها واوقات كتير بتعيد نفسها,  موقف  بغلطاته او بحلاوته ممكن يكون العامل المساعد فى شخصيته, ممكن يكون هو العامل بتاع الموقف نفسه اللى اثر فيه بفعله واختياره, بس في العاده مواجهه النفس قاسيه, لذا ان اهم حاجة انك تواجهه نفسك علشان تلاقى نفسك, اهم حاجة انك دايما مع كل يوم تبقى حابب يومك, لان اليوم بيعد  سنة,   ان ماحبتش السنة ازاى حاتحب السنين!

كل يوم فيه حاجة حلوة دايما الواحد بيبص للحاجة الحلوة  عشان هى بتبقى البهجه بتاعت اليوم حتى لو كان فيه حاجة كانت محبطة

ايجابياتك فى الحياة هى حصيلة عمرك كله,  لان دايما عندك شريط ذكريات ليك بيجرى فى دماغك وانت مع نفسك  وانت سرحان  فى موقف  فى لقطة  فى كلمة  فى حاجة لفتت نظرك  دايما حترجعك  لذكرى  فخليها دايما ذكرى حلوة

خلى دايما عندك فيه بسمة,  ضحكة,  خلى دايما عندك امل, خلى دايما يقين ان كل حاجة جاية احسن,  لان الدقيقة اللى انت بتعيشها هى الذكرى  هى الامل وهى  الواقع  هى اللى حتكون بكره وفى وقتها الحاضر والماضى..

ماحدش ينكر ان فى الحياة مطبات كتير,  وانها ساعات بتكون بتوجع لكن  من الحاجات ان قدرة البنى ادم  انه يقدر يتحمل الصعاب وانه يقدر يتحمل اى حاجة  ويثابر على العيشة دايما بقوه وهو يعرف يعديها   ممكن يتوجع شوية  ممكن يتفرمل شوية  ممكن يهدى شوية  انما فى الاخر هو بيكون هوه

السن مع مسافه الوقت ساعات بيبقى بينهم فراغ  الفراغ ده بيتملى بانك ترجع للذكريات,  لو كانت ذكرياتك حلوة حتديلك دفعة للى جاى,  فحاول ماتفكرش لو كانت الذكريات فيها مطبات وصعبة, وان اللى جاى يكون احسن لان دايما فيه احسن, لان الحياه زى ما بنعيش فيها الآلم,  بنعيش فيها الفرح..

مصرية