من خواطري: آخر أيام ال ٣٦٥ بقلم منى حسن

دائما اخر ايام السنه بتشعرك بحاجه فيها جمال ساحره, جوها بيتملى فيه حب وبهجه .. فيها قدسيه جميله تملاك ايجابيه, كل الناس وشوشها بشوشه, و مليانه فى المحلات, والشوارع نضيفه متزينه وورود, اجراس الكنايس دقاتها كانها ترانيم, كإن عصايه سحريه حركتها ما بين يوم وليل…

ناس بتغنى فى الشوارع باصواتهم الجميله, احساس فيه راحه بينسيك ضغوط وهموم الحياه.

ليله راسالسنه, نهايه ال ٣٦٥ يوم هى لبدايه جديده لسنه جديده, اللى قبلها خلصت فى لحظة ما يقلب عقرب الساعه بإعلانها.

السنين اللى بتعدى حسابتها ببدايه سنه جديده واحداثها منها بيكمل معاك ومنها بيتنسى ومنها بيتغربل فى نص الطريق..

السنه, اليوم فيها حياه, وكل يوم حياه جديده بنفس معايير السنه اللى بتعيشها ولكن مع نهايتها, سردها بيكون فى لحظه..

الوقت بيمر بسرعه والايام بتجرى, حسبه اليوم والاسابيع حتى الشهور فقد معناها كأن مجموع السنه كانها يوم..

مع ان اليوم ده حياه ويوم مليان احداثه بتعيش معاك طول السنه..

احلى حاجه فى اخر ايام السنه انه بيجمع كل الناس بحب وصفاء وبهجه بتلقائية من القلب,.

منكرش ان السنه محمله بضغوط وحمل مسؤوليات معظم الناس بتعيشها, احيانا حجم المعاناة مابتسمحش بمساحه وقت لأخذ النفس والراحه.. ولكن الحياه هى بقت كده دلوقتى مليانه وسريعه,

لكن الشوارع ليه ماتكونش بالنضافه والاعتناء, والشجر والورد والزخارف تفضل تكون موجوده طول السنه تملى روحك بالايجابية اللى تساعد على تحمل اعباء الحياة..

ومع اخر السنه دايما فى امنيات وامل لتحقيقها فى السنه الجديده, ولكن بتلاقى نفسك مع السنه بتنسي وتغوص فى حياتك ورتمها وساعات على اخر السنه تعيد نفس الامانى ولكن السنه تجر السنه ودى من دايره الحياه, لان كل امنيه بتتحق فى وقتها وكتيير مهما سعيت, لكن مره واحده تلاقيها جت لحد عندك..

جميل انك تتمنى وجميل انك مع كل بدايه جديده تحاول للاحسن لان من غير امل مافيش تفاؤل

جماله فى مصدقيته وانك تتأمل وتعيش اللى نفسك فيه.. ومن غير ماتدري حايجى وقت وتلاقيه..

ومع اخر ال ٣٦٥ يوم, بالعصايه السحريه يجى برضه السلام والجو يرجع من غير أوبئة وترجع الابتسامه الدايمه المرتاحه…

كلمه حب وضحكه دافيه من القلب احلى حاجه تبتدى بيها السنه الجديده لو من قلبك صحيح اعرف انك بتملاها امل ومصدقيه, علشان هو ده ايجابيه سحر الوجود

اما لو غشيت حاتجر ال٣٦٥ يوم زى اللى قبلها! ساعتها حايكون صاحب العصايه السحريه طار…

وانت الخسران!.

بحبك وضحكه دافيه من القلب وورده 2023

 

منى حسن

مصريه