من خواطرى الحب ده حكايه بقلم منى حسن

اللى بيحب ده  بيبقى دايما عايز يسمع صوت حبيبه اللى بيحب

اول حاجة الصبح  يبقى ياشايفه ياسامعه 

 اللى بيحب

 بيحب يشركه فى كل حاجة بيعملها عشان هو شريكه

اللى بيحب

 مايستحملش انه يكون فى محنة  ومايبقاش جنبه

اللى بيحب

 مايهاجمش  ويساعد من غير مايقول

اللى بيحب بيبص من بعيد ويعرف  حبيبه هو عايز ايه ويعمله .

اللى بيحب بيسال عليه وايه اللى محتاجه من غير مايقول

اللى بيحب بيفكر له   وبيلغى نفسه ساعات

 اللى بيحب بيدى من غير مايكون عنده فكر

بس لو وقفنا وقفة هنا وفكرنا اللى بيحب ده درجات تتوقف على شخصية البنى ادم..

   فيه ناس بتحب بس مش عطاءة  بتاخد بس بدها شىء من الانانية مش شايفة غير نفسها واحتياجاتها   ملهاش دعوة باحتياجات الاخر  وفيه ناس تانية بتحب تاخد وتدى بشويش بالقطارة  وفيه ناس بتحب  وبتدى بحرص بس لانها مابتعرفش ازاى تدى  ممكن تبقى من جواها عايزة بس مابتعرفش فممكن تخرج منها بصور تانية  وفيه ناس بتدى مستنية تقدير وبتاخد  وفيه ناس بتدى وتحسسك انها بتديلك  وده شيء مش لطيف وفظيع لان اللى بيدى حاجة مش المفروض انه يقعد يفكر اللى قدامه انه اداله او انه بيعملها كجميلة لان هو عايز يدى..

 وفى ناس تانيه تملاك حب وراحه..

اللى بيدى بقلبه ده  ماتفرطش فيه,  هو عملة نادرة فى الوقت والزمن ده, لان اللى بيدى بجد بنى ادم, انسان يعرف يقدر اللى قدامه واللى حواليه,  بنى ادم  يعتمد عليه, لان اللى بيلغى نفسه عشان حد, دى في حد ذاتها  زى مابيقولوا كده حاجه نادرة..

 عملة نادرة فى الزمن ده

احلى حاجة فى الدنيا انك تكون بتحب وانك تدى عشان دى راحة  سعادة, سعادة بتشوفها فى عين اللى قدامك, سعادة انك بتدى السكينة للى قدامك, سعادة بتدى الامان للى قدامك,  سعادة بتحسسه انه هو مش لوحده , سعادة انك بتقول له ماتخافش, سعادة انك بتقول له انا باحبك  , سعادة انك بتقول له وجودك منور حياتى

للاسف الشديد المعانى دى كلها, وساعات فى زحمة الدنيا والعيشة بضغوطها وقسوة تعامل الناس بقت منسيه,  بقت مغلفة او مغمورة  مابقتش تطلع بسهولة  التعامل بيها  بقى بخوف وبحرص مابقاش حد عارف اللى بيعمل ده عايز ايه من ورا الكلام ده,  مابقاش حد بيصدق ان فيه حد بيعمل ده  وغير مشروط ولا عاوز مردود  

اهتزاز الاحاسيس فى المواقف والاحداث اللى بتحصل فى حياة البنى ادم بتلخبطه,  ساعات بتعمل غمامة على عنيه مابيبقاش عارف اللى بجد من اللى مش بجد  حتى لو كان هو عنده خبرة  لانه ساعات بيتخم

فيه ناس قادرة على انها تخومك, فيه ناس نصابة, نصابة مشاعر, ودى من ابشع الدرجات اللى ممكن تكون فى الحياة  ان حد يلعب بمشاعرك عشان يوصل لاى هدف هو عايزه,  سواء فلوس سواء حب سواء جسد سواء شغل سواء وظيفة  سواء مكانة,  اى حاجة حتى بس انه عاوز يعرفك

اللعب بالمشاعر ده شىء صعب غدر وخيانه

لكن

من احلى الحاجات اللى بيعيشك فى هالة جميلة كلها نور وحب وسكينة وانت نايم مرتاح عارف ان حد بيحبك بجد, معاك حد من قلبه بيخاف عليك, مش عايز منك حاجة غير مجرد انه يشوفك سعيد مرتاح آمن,   مايحاولش يكذب عليك او يخونك او يكسرك مايحاولش يهينك مايحاولش انه يحسسك انك مالكش قيمة, بل بالعكس بيفتح لك سكك كتير ينور لك فيها بصيرتك  لو محتار او مش فاهم,  يديلك  الحب والامان والسكينة بيدلك البسمه في قلبك وابتسامه بسعاده,  بيحسسك انك مش لوحدك  بيحسسك انك شبعان.. مليان بيه حتى من نظرة عنيه بلمسة ايده بحضنه  بكلمته بعطائه لانه..

ببساطة شديدة هو بيحب

وفى الاخر هو بجد انسان

مصرية