من خواطرى من السحتوت للجنيه بقلم مني حسن

احنا الحياه عندنا بقت كأنها عيشه باليرات التلياني من 10000 ليره وخمسن الف و 100الف, كلهم ما يسوش حاجه في الاخر..
زمان كان عندنا سحتوت وده ربع مليم كان له قيمه, يعني في مليم, وبعدين بقى تعريفه وقرش وجنيه..
والقرش والجنيه كانوا لحد قريب اوي من كام سنه مش من بعيد ري اول امبارح كده, كان لهم قيمه! كان يوم ما تقول ده ب 10 جنيه تقول يااه او ب 100 جنيه كنت تقول ده غالي! الخمس سنين ولا التلاته اللي فاتوا, وارقام واصفار زادت من كل حته, والقرش اللي كنت تاخد بيه ريفو واللي كان 100 منه يعملوا جنيه, بقى لازم تحط عليهم صفرين علشان تقدر تتعايش, ولكن منين الصفرين؟ والاسعار في تزايد والدخل نسبه ارتفاعه مش موكبه المتزايد, حيقدر الواحد يتماسك او يقدر يتحمل ده لحد امتى,
وان كان قدره التحمل بالضغوط والتنازلات احيانا عن الأساسيات لكن حايواصل استحماله اد ايه! ..
كان زمان عندنا حاجه اسمها ريال وشلن, كان هو الخمسه صاغ واتسمي شلن علشان خاطر الانجليزي ايام ما كانون في مصر, اما الريال كان اسمه ريال علشان كان يساوي ريال الاسباني, حاجه غريبه جدا قد ايه كنا اقوايا, اما طبعا الزمن الأقدم كان فيه عملات تانيه خالص ما بقتش موجوده, ولكن مع الوقت اتغيرت مع العثمانين والملك فؤاد بقى عندنا جنيه, والجنيه وقتها بقى قوي جدا, طبعا مش هنتكلم على ميزان الجنيه بالذهب ودولار لان ده خارج الموضوع..
اساس الموضوع ايه كل الاصفار دي!!. وأهل المجتمع حايعمل ايه عشان يقدر يعيش و يواكب الاسعار دي, وخصوصا الفلوس اصلا بتطير زي عصافير الجنه اول ما الواحد يخرج من باب بيته! ما فيش حاجه تجيبها الا برقم, حتى بقت قطعه الطعميه برقم, وهي الاكله الشعبيه لبلد, ومشهورين بالفول والطعميه والكشري والعيش البلدي, كلهم دول بقوا ارقام, فيها اصفار, صحيح كان زمان في اصفار, ولكن كانت اصفار في تعريفه وقروش مش في جنيهات, ده الجنيه كمان دلوقتي مقداره بقى في مقدار القرش, ال 10 جنيه بقت في مقدار البريزه, ال 20 جنيه بقت في مقدار الريال, بس بتاع بلدنا
حتى ايام الليره كانت كلها اصفار وكانت تساوي رقم صغير بالنسبه للمعيشه وكانت بتناسب الحياه والتعايش بيها وكان كله وقتها مبسوط..
وبتوحيد العمله اصبح برضه العيشه مناسبه نسبيا ومتماشيه مع ظروف الحياه والمعيشة بمعايرها..
اما هنا الجنيه كان تجيب بيه حاجات كتير والباقي منه قروش تاخد بيها بونبوني أو لبان أو ريفو
دلوقتى ال 100 جنيه تجيب حاجه واحده وتكمل عليها..
هو كام 100 جنيه في الاف؟ هما 10
يعني محتاج بدل 10 تكون 100 في الالف وتقلب موازين الحسابات!!
من وجهه نظري نرجع نعيش ببساطه لكن حتى العيشه البسيطه بقت مكلفه!
الخشب غلي والفحم غلي والزيت والجاز الخ
لازم يكون في حل مثلا في أوربا حاولوا توحيد العمله باليورو في بلاد اضرت وبلاد انسحبت وبلاد رفضت من أساسه..
ليه ما فيش تفكيران يكون عمله مع البلاد المجاوره افرو اسيويه يمكن تحل الموضوع, يمكن تعمل نوع من انواع الاستقرار الاقتصادي, ممكن يعاني منه شويه المجتمع ولكن مع الوقت ممكن الاحوال تتحسن٠!
أو حل جذري لنزول الأسعار ورقابه مشدده على الجوده أيضا وزياده الدخل وتوفير رعايه صحه صحيه!
موضوع توحيد عمله
من الجايز ان مجتمعنا في الوقت الحالي مايستحملش, وممكن مش من مصلحه البلاد الأخرى الدخول في هذا التغيير ولكن ما هو الحل؟
الاصفار تزيد وسمعها بيخض المواطن والسلع بتقل مع الجوده, والماده مش قادره تعيش مع الزياده, عماله تقل وقله قيمتها بقى فيه صرخه استغاثه ومعاناه لكل الفئات والعمرية و
في كل المجتمعات..
قيمه الإنسان نفسه بدءت تصرخ لان آدميته في اهانه, وحياته ينقصها الاستقرار والأمان, ده غير صحته المهدده من الاؤبئه والأمراض وقله العلاج الغير متوفر..
صحيح البشر في زياده ملحوظه وتتزايد, والموارد بتقل ومافيش تقريبا انتاج يكفي, والزراعة مساحتها قلت والحروب انتشارها يخل منظومه التعايش العادل
للاسف وضع قائم لدوره من دورات الحياه الحاليه..
ام
هل ده بدايه نهايه زمن وحقبه!!
23.05.2024